Akkauntni o'chirish

ZuvExpress akkauntingizni va u bilan bog'liq shaxsiy ma'lumotlarni istalgan vaqtda o'chirishingiz mumkin. Buni ikki yo'l bilan qilish mumkin: ilovaning o'zida yoki ilovani o'rnatmasdan — qo'llab-quvvatlash xizmatiga so'rov yuborib.

1. Ilova orqali o'chirish

Eng tez yo'l — ilovaning o'zidan:

• Profil bo'limini oching.
• Sahifaning eng pastidagi qizil «Akkauntni o'chirish» tugmasini bosing.
• Tasdiqlash oynasida «Ha, o'chirish»ni tanlang.

Tasdiqlaganingizdan so'ng shaxsiy ma'lumotlaringiz o'sha zahoti o'chiriladi va ilovadan chiqarilasiz. Bu amalni qaytarib bo'lmaydi.

2. Ilovasiz — so'rov yuborish

Ilovani o'chirib tashlagan bo'lsangiz yoki telefoningiz yo'q bo'lsa, so'rovni quyidagi kanallardan biri orqali yuboring:

• Telegram: @zuv_support_bot
• Email: support@zuvexpress.com
• Telefon: +998 99 906 06 06

Xabarda akkauntga bog'langan telefon raqamini ko'rsating va akkauntni o'chirishni so'rayotganingizni yozing. So'rovni bajarishdan oldin qo'llab-quvvatlash xizmati o'sha raqam haqiqatan sizniki ekanini tasdiqlashni so'rashi mumkin — bu boshqa odam sizning akkauntingizni o'chirib yuborishining oldini oladi.

Hech qachon karta raqamingizni, PIN yoki Click parolingizni yubormang — biz buni so'ramaymiz va bu ma'lumotlar bizda saqlanmaydi.

Bu sahifada forma yo'q: so'rov yuqoridagi kanallar orqali qabul qilinadi.

3. Nimalar o'chiriladi

Akkaunt o'chirilganda quyidagilar tizimdan olib tashlanadi:

• Ism-familiyangiz va profil ma'lumotlaringiz.
• Telefon raqamingiz. Raqam bo'shatiladi — keyinchalik xohlasangiz, o'sha raqam bilan yangidan ro'yxatdan o'tishingiz mumkin. Bu butunlay yangi akkaunt bo'ladi, eski tarix unga bog'lanmaydi.
• Profil surati — nafaqat havolasi, balki faylning o'zi ham saqlash serveridan o'chiriladi.
• Buyurtmalaringizdagi manzillar — olib ketish va yetkazib berish manzillari, ularning koordinatalari, izohlaringiz, qabul qiluvchining ismi va telefon raqami, yetkazib berish imzosi va tasdiqlash kodi.
• Qurilma va push tokenlari — shundan keyin sizga hech qanday bildirishnoma yubormaymiz.
• SMS tasdiqlash kodlari (OTP yozuvlari).
• Baholashlarda yozgan izohlaringiz (matn). Yulduzchalar — 4-bo'limga qarang.
• Qo'llab-quvvatlash murojaatlaringiz matni va Telegram chat identifikatoringiz.
• To'lov havolalari — Click checkout havolasi ichidagi telefon raqamingiz ham o'chiriladi.
• Haydovchilar uchun qo'shimcha: mashinangizning rusumi, modeli, rangi va davlat raqami; reytingingiz o'rtachasi; eski to'lov rekvizitlari; qaysi buyurtmalarni rad etganingiz tarixi; joylashuvingiz izi. Ochiq turgan buyurtma lentasi ulanishi ham darhol uziladi.

Qurilmangizning o'zida saqlanadigan ma'lumotlar ham tozalanadi: saqlangan manzillar — «Uy», «Ish» va oxirgi ishlatilgan manzillar ro'yxati — akkaunt o'chirilganda (shuningdek, tizimdan chiqqaningizda) qurilmadan olib tashlanadi. Til tanlovi va mavzu sozlamasi kabi qolgan mahalliy sozlamalar serverga bog'liq emas va ilovani o'chirib tashlaganingizda qurilma bilan birga ketadi.

4. Nimalar saqlanib qoladi va nega

Buyurtma va to'lov yozuvlari o'chirilmaydi. Soliq va buxgalteriya hisobi to'g'risidagi qonunchilik moliyaviy operatsiyalarni belgilangan muddat davomida saqlashni talab qiladi, shuning uchun bu yozuvlarni o'chira olmaymiz. Saqlanadigan yozuvlar:

• Buyurtma yozuvlari: sana, holat, summa, komissiya. Ammo yuqorida sanab o'tilgan shaxsiy maydonlar (ism, telefon, manzil, koordinatalar) ulardan olib tashlanadi — yozuv shaxssiz moliyaviy qayd sifatida qoladi.
• To'lov yozuvlari: summa, holat, to'langan sana va Click tranzaksiya identifikatori.
• Obuna yozuvlari va ularga qo'lda kiritilgan tuzatishlar (masalan, operator qo'shgan kunlar).
• Baholash yulduzchalari — siz qo'ygan baho boshqa odamning o'rtacha reytingini shakllantiradi, shuning uchun raqam qoladi; siz yozgan matn esa o'chiriladi.
• Qo'llab-quvvatlash murojaatining «skeleti» — holati, kategoriyasi va sanasi. Yozgan matningiz o'chiriladi.

Bundan tashqari, Click orqali amalga oshirilgan to'lovlar Click tizimida ham qayd etiladi. Ular Click'ning o'z qoidalariga bo'ysunadi va biz ularni siz uchun o'chira olmaymiz.

5. O'chirish qachon vaqtincha rad etiladi

Ikki holatda o'chirish darhol bajarilmaydi:

• Yakunlanmagan buyurtma bor. Siz mijoz yoki haydovchi sifatida qatnashayotgan buyurtma hali yo'lda bo'lsa, akkauntni o'chirib bo'lmaydi — aks holda ikkinchi tomon nomsiz sherik bilan qolib ketadi. Buyurtmani yakunlang yoki bekor qiling, so'ng qayta urinib ko'ring.
• Haydovchi obunasining to'langan muddati tugamagan. To'lagan vaqtingiz hali ishlab turgan bo'lsa, o'chirish uni kuydiradi va pul qaytarilmaydi. Shu sababli muddat tugashini kutasiz. 48 soatlik imtiyozli muddat (grace) esa o'chirishga to'sqinlik qilmaydi.

Xodim (admin) akkauntlari o'zini o'zi o'chira olmaydi — ular boshqa administrator tomonidan olib tashlanadi.

Har ikkala cheklov ham vaqtinchalik: sabab yo'qolgach, o'chirish odatdagidek ishlaydi.

6. Qancha vaqt ketadi

Ilovadagi tugma orqali o'chirsangiz — shaxsiy ma'lumotlar o'sha zahoti o'chiriladi. So'rov qo'llab-quvvatlash orqali kelgan bo'lsa, biz uni 30 kun ichida bajaramiz. Bu Maxfiylik siyosatining 4- va 5-bo'limlarida e'lon qilingan muddat bilan bir xil.

7. Faqat Telegram botdan foydalanganlar

Agar siz ilovani umuman o'rnatmagan bo'lsangiz va faqat @ZuvExpressBot yoki @ZuvExpressHaydovchiBot botlaridan foydalangan bo'lsangiz, sizda ilova akkaunti yo'q — ilovadagi tugma sizga tegishli emas. Bot orqali saqlangan ma'lumotlaringizni (Telegram identifikatori, ismingiz, telefon raqamingiz va bot orqali bergan buyurtmalaringiz) o'chirish uchun 2-bo'limdagi kanallar orqali murojaat qiling. Bunday so'rovlar qo'lda bajariladi — muddat o'sha 30 kun.

8. Bog'lanish

Savol bo'lsa: Telegram — @zuv_support_bot, email — support@zuvexpress.com, telefon — +998 99 906 06 06. Barcha kanallar Aloqa sahifasida. Ma'lumotlar bilan ishlash tartibi — Maxfiylik siyosatida.